၂၀၁၈ မတစ ၄၃ စီရင်ထုံးပါအဆုံးအဖြတ်ကိစ္စ

ဆရာကြီးဦးမြသင်ကြားပို့ချချက်များ

Seasons Overseas Pte.,Ltd ပါ၉ နှင့် Great Light Co.,Ltd ပါ၇

၂၀၁၈ခုနှစ်မြန်မာနိုင်ငံတရားစီရင်ထုံးများ(တရားမ)စာ၄၃

စီရင်ထုံးပါအဆုံးအဖြတ်ကိစ္စ

အမှုမှာတရားလိုများကအာရပ်စော်ဘွားများပြည်ထောင်စုဒူဘိုင်းလေယာဉ်ကွင်းအာဏာပိုင်ကသက်သေခံလက်မှတ်ရေးထိုးထားသောအမှတ်( ၇ )တရားလိုကုမ္ပဏီ၏အစည်းအဝေးမှတ်တမ်းကိုသက်သေခံအဖြစ်လက်မခံသောကြောင့် သက်သေခံအဖြစ်လက်ခံပေးရန်တက်ရောက်လာသောပြင်ဆင်မှုဖြစ်သည်။

ရမ်အောက် နှင့် မြန်မာနိုင်ငံအစိုးရ

၁၉၃၉ခုနှစ်ရန်ကုန်စီရင်ထုံးစာ၅၉၁ 

အမှုတွင်"သက်သေခံချက်ကိုပယ်ခြင်းသည်ကုစား၍မရနိုင်လောက်သောနစ်နာမှုမဟုတ်"ဟုလမ်းညွှန်ထားပြီး-

ဟာဂျီနူးအာမက် နှင့် ဒေါ်ဇိုမီလာခါတွန်

၁၉၆၀ပြည့်နှစ်၊မြန်မာနိုင်ငံတရားစီရင်ထုံး(တရားလွှတ်တော် )စာ -၇ 

အမှုတွင်သက်သေခံချက်ကိုမှားယွင်းလက်ခံခြင်းအပေါ် ပြင်ဆင်မှုတွင်စွက်ဖက်ခွင့်မရှိဟု-

" A mistake made by a trial Court regarding the admissibility of evidence in the course of trial cannot be made the ground for revision " 

လမ်းညွှန်ထားချက်များအရစာရွက်စာတမ်းသက်သေခံလက်မခံတဲ့ကိစ္စဟာပြင်ဆင်မှုမှာစွက်ဖက်ခွင့်ရှိတဲ့ကိစ္စမျိုးမဟုတ်ပါ။

ဒါအပြင်တရားမကျင့်ထုံးဥပဒေအမိန့်၄၁နည်း၂၇(၁)(က)တွင်မူလရုံးကလက်ခံသင့်သည့်သက်သေခံချက်ကိုငြင်းပယ်လျှင်အယူခံရုံးကလက်ခံနိုင်တယ်လို့ပြဌာန်းထားတာတွေ့မြင်နိုင်ပါတယ်။ 

ဒါအပြင်တဦးတယောက်ရဲ့နစ်နာမှုကိုဥပဒေအရကုစားရန်နည်းလမ်းပွင့်နေသည့်ကိစ္စမျိုး၌မူလရုံး၏ဆုံးဖြတ်ချက်အပေါ် ပြင်ဆင်မှုတရားရုံးကပြင်ဆင်မှုတွင်ဝင်ရောက်စွက်ဖက်နိုင်မည်မဟုတ်ကြောင်းထုံးဖွဲ့ထားသည့်စီရင်ထုံးများ(ဥပမာ-1987 BLR 5 ၊ 1990 BLR 15 )အမှုများတွင်လမ်းညွှန်ထားရှိပြီးဖြစ်ပါတယ်။

အခုလိုအခြေအနေမှာအထက်ပါစီရင်ထုံးနှင့်ဥပဒေပြဌာန်းချက်တို့အရသက်သေခံအဖြစ်လက်ခံသင့်မသင့်ဆုံးဖြတ်ရန်ဖြစ်ပါတယ်။ 

သို့သော်ပြည်ထောင်စုတရားလွှတ်တော်ချုပ်ကသက်သေခံအက်ဥပဒေပုဒ်မ ၈၅ နှင့် ပုဒ်မ ၇၈၊ပုဒ်မခွဲ၆တို့ကိုကိုးကားဆုံးဖြတ်ခဲ့ပါတယ်။

ပုဒ်မ၈၅ကိုလေ့လာကြည့်ပါလျှင် The Court shall presume လို့ပြဌာန်းထားချက်အရပင်သက်သေခံဝင်၊မဝင်ကိစ္စနဲ့ပတ်သက်ပြီးပြဌာန်းထားချက်မဟုတ်ဘဲမှတ်ယူနိုင်ကြောင်းသာပြဌာန်းထားခြင်းဖြစ်တာကိုတွေ့မြင်နိုင်ပါတယ်။ 

အလားတူပုဒ်မ ၇၈ ( ၆ )ကိုလေ့လာကြည့်မယ်ဆိုလျှင်လည်းပုဒ်မ၇၈ဟာ public documents ကိုရည်ညွှန်းထားတာတွေ့နိုင်ပါတယ်။

အခုသက်သေခံတင်ပြလိုတဲ့စာရွက်စာတမ်းဟာအာရပ်စော်ဘွားများပြည်ထောင်စု ဒူဘိုင်းလေယာဉ်ကွင်းအာဏာပိုင်ကသက်သေခံလက်မှတ်ရေးထိုးထားသောအမှတ် ( ၇ )တရားလိုကုမ္ပဏီ၏အစည်းအဝေးမှတ်တမ်းဖြစ်တဲ့အတွက်ပုဒ်မ၇၈မှာအကျုံးဝင်တဲ့စာရွက်စာတမ်းမျိုးမဟုတ်ပါ။

ဒါကြောင့်တရားလွှတ်တော်ချုပ်ကအဲဒီအစည်းအဝေးမှတ်တမ်းကိုသက်သေခံအဖြစ်လက်ခံသင့်မသင့်ဆုံးဖြတ်ရာမှာကိုးကားခဲ့တဲ့ဥပဒေတွေဟာအချင်းဖြစ်အစည်းအဝေးမှတ်တမ်းကိုသက်သေခံအဖြစ်လက်ခံသင့်မသင့်ကိစ္စနှင့်သက်ဆိုင်ခြင်းမရှိဘဲ ကိုးကားထားတာဖြစ်တဲ့အတွက်အင်မတန်အံ့ဩဖို့ကောင်းတဲ့စီရင်ချက်ဖြစ်နေပါသည်။