အရေးယူလောက်သောဥပဒေပြဿနာနှင့်ငြင်းချက်အကြောင်း ( ၂ )
ဆရာကြီးဦးမြသင်ကြားပို့ချချက်များ
အရေးယူလောက်သောဥပဒေပြဿနာနှင့်ငြင်းချက်အကြောင်း၂
တရားမမှုတမှုတွင်တရားလိုအားအနိုင်သို့မဟုတ်အရှုံးပေးရန်ပြဿနာသည်၊ပင်မအငြင်းပွားမှုဖြစ်သည်။
အမိန့်၁၄၊နည်း၁( ၂ )တွင်ရည်ညွှန်းထားသောအရေးပါသည့်အကြောင်းခြင်းရာနှင့် ဥပဒေအချက်အလက်တို့နှင့်သက်ဆိုင်သောအငြင်းပွားမှုများသည်ထိုအငြင်းပွားမှု၏အစိတ်အပိုင်းများဖြစ်ကြရာထိုအငြင်းပွားမှုတို့၏အဖြေအသီးသီး၏ဘောင်သည်ပင်မအငြင်းပွားမှုထက်များစွာကျဉ်းမြောင်းသည်ဖြစ်၍ထိုအငြင်းပွားမှုများ၏အဖြေတို့ကိုရှာခြင်းသည်အထိုက်အလျောက်ပို၍လွယ်ကူသည်။
ထိုအငြင်းပွားမှုအသီးသီး၏အဖြေများကိုထုတ်ယူရရှိသောအခါ တရားလိုအားအရှုံးပေးသင့်သလား သို့မဟုတ် အနိုင်ပေးသင့်သလား။
အနိုင်ပေးသင့်လျှင်မည်သည့်သက်သာခွင့်ပေးသင့်သနည်းဟူသောအန္တိမအဆုံးအဖြတ်ကိုချမှတ်ရန်လမ်းပွင့်သွားမည်ဖြစ်သည်။
အမိန့်၁၄ ၊ နည်း ၁ ( ၂ )တွင်ရည်ညွှန်းထားသောအရေးပါသည့်အကြောင်းခြင်းရာနှင့် ဥပဒေအချက်အလက်တို့၏အဖြေများသည်တရားလိုအားအနိုင်အရှုံးဆုံးဖြတ်နိုင်ရန် လွယ်ကူချောမောစေသည်။
အင်္ဂလိပ်ဝေါဟာရမှာ facilitate ဖြစ်သည်။
ပင်မအငြင်းပွားမှုကိုပိုင်းဆစ်ပြီး၊တပိုင်းစီဆုံးဖြတ်ရသည့်သဘောဖြစ်သည်။
ဥပမာ ။ ။ ချေးငွေရလိုမှုတွင်တရားလိုသည်တရားပြိုင်အားငွေချေးသည်ဆိုခြင်းမှန် မမှန်၊တရားပြိုင်ကတရားလိုအားထိုငွေကိုအပြေအကျေပြန်ဆပ်ပြီးမပြီး၊တရားလိုသည်ငွေတိုးချေးစားခြင်းအက်ဥပဒေတွင်အကျုံးဝင်သောငွေတိုးချေးစားသူဟုတ်မဟုတ်၊မှန်လျှင်ငွေတိုးချေးစားသူအဖြစ်မှတ်ပုံတင်ထားသူဟုတ်မဟုတ်စသည့်အငြင်းပွားမှုအသီးသီး၏အဖြေများကိုသီးခြားစိစစ်ဆုံးဖြတ်လိုက်သည့်အခါတရားလိုအားသက်သာခွင့်တစုံတရာပေးသင့်မသင့်ဆုံးဖြတ်ရန်မခက်ခဲတော့။
( မှတ်ချက်။ ။ တရားလိုသည်မည်သည့်သက်သာခွင့်ရထိုက်သနည်းဟူသောငြင်းချက်ကိုဖြေဆိုရာ၌ခြွင်းချက်အမှုများဖြစ်သည့် 1971 BLR 62 ( S B )နှင့် 1964 BLR 627 စီရင်ထုံးများကိုဖတ်ပါ။ )
ဤအကြောင်းကြောင့်တရားမကြီးမှုတွင်ငြင်းချက်များကိုထုတ်နှုတ်စစ်ဆေးစီရင်ရခြင်းဖြစ်သည်။
တဖက်တွင်ယာယီတားဝရမ်းထုတ်ဆင့်ပေးရန်လျှောက်ထားခြင်း၊ပစ္စည်းထိန်းခန့်ထားပေးရန်လျှောက်ထားခြင်း၊စီရင်ချက်မချမီတရားပြိုင်၏ပစ္စည်းကိုဝရမ်းကပ်ပေးရန်လျှောက်ထားခြင်းစသည့်ကိစ္စများတွင်မူအငြင်းပွားမှုများမှာအထိုက်အလျောက်ကျဉ်းမြောင်းသည်ဖြစ်၍ငြင်းချက်ထုတ်နှုတ်စစ်ဆေးရန်မလို။
Comments
Post a Comment