ပစ္စည်းခွဲဝေပေးစေလိုမှုနှင့်စပ်လျဉ်း၍၊မမြ နှင့် မမြဲစီရင်ထုံး၊(၁၈၉၇-၀၁)အထက်မြန်မာအတွဲ၂၊စာ၂၂၉ကိုမှတ်သားထားဖို့လိုပါသည်။

ဆရာကြီးဦးမြသင်ကြားပို့ချချက်များ

ပစ္စည်းခွဲဝေပေးစေလိုမှုနှင့်စပ်လျဉ်း၍၊မမြ နှင့် မမြဲစီရင်ထုံး၊(၁၈၉၇-၀၁)အထက်မြန်မာအတွဲ၂၊စာ၂၂၉ကိုမှတ်သားထားဖို့လိုပါသည်။

ပစ္စည်းခွဲဝေပေးစေလိုမှုစွဲဆိုရာတွင်ခွဲဝေရန်ရှိသောပစ္စည်းအားလုံးကိုခွဲဝေပေးရန်တောင်းဆိုရမည်။

ပစ္စည်းတစိတ်တဒေသကိုခွဲဝေပေးရန်စွဲဆိုခြင်းမပြုနိုင်။

အမှုသည်များပူးတွဲပိုင်ဆိုင်သောပစ္စည်းအရပ်ရပ်ကိုခွဲဝေပေးရန်တောင်းဆိုရန်လိုအပ်ခြင်း​၏ယေဘုယျမူသဘောမှာအမှုပွားများခြင်းကိုပိတ်ပင်ရန်ဖြစ်သည်။

ထိုဥပဒေသဘော​၏ခြွင်းချက်ကို၊မဆင်တီ နှင့် စောမောင်ပုစီရင်ထုံး (၁၉၅၂မတစ၃၄၄(တရားလွှတ်တော်)တွင်တွေ့မြင်နိုင်သည်။

ကွယ်လွန်သူမခိုင်မတွင်စောမောင်မောင်နှင့်စောမောင်ပုသားနှစ်ယောက်ရှိသည်။

စောမောင်မောင်သည်ဝဏ္ဏဆိုသူနှင့်အိမ်ထောင်ကျ၍မဆင်တီအပါအဝင်သားသမီးသုံးယောက်ရရှိသည်။

မခိုင်မကွယ်လွန်ပြီးနောက်မကြာမီစောမောင်မောင်ကွယ်လွန်သည်။

၁၉၂၆ခုနှစ်တွင်စောမောင်ပုသည်မိခင်ကျန်ရစ်သောအချင်းဖြစ်မြေအပါအဝင်အမွေပစ္စည်းများကိုအခြားအမွေဆိုင်များအားအသိမပေးဘဲချစ်တီးထံပေါင်ခဲ့သည်။

နောက်ပိုင်းတွင်၎င်းချစ်တီးထံမှငွေကျပ်၄၀၀၀ချေးယူရာမပေးဆပ်နိုင်၍ချစ်တီးက၎င်းအပေါ်ငွေဒီကရီရရှိသည်။

ထိုငွေဒီကရီကိုအတည်ပြုရာတွင်ပေါင်ထားသောပစ္စည်းများကိုဝရမ်းကပ်သည်။

ထိုအခါစောမောင်မောင်​၏ဇနီးနှင့်သားသမီးများကဝရမ်းခွာပေးရန်လျှောက်ထားရာတရားရုံးက၊တဝက်ဝေစုအတွက်ဝရမ်းခွာပေးပြီးစောမောင်ပု​၏ဝေစုကိုရောင်းချလိုက်သည်။

အချင်းဖြစ်မြေနှင့်ထိုမြေပေါ်ရှိအိမ်ကိုလေလံတင်ရောင်းချရာ၌ချစ်တီးကဝယ်ယူခဲ့ရာမှနောက်ဆုံးတွင်ယူစွတ်နှင့်ကာဆင်တို့ကဝယ်ယူလိုက်ကြသည်။

အိမ်မှာမူစစ်အတွင်းတွင်ပျက်စီးသွားသည်။

စောမောင်မောင်​၏သားသမီးသုံးယောက်ကအချင်းဖြစ်မြေနှင့်အိမ်ကိုတရားရုံးကလေလံတင်ရောင်းချစဉ်ကမိမိတို့မှာအရွယ်မရောက်သေးသူများဖြစ်ပြီးမိမိတို့​၏အကျိုးကိုစောင့်ရှောက်မည့်သူလည်းမရှိခဲ့ကြောင်းစသည်ဖြင့်အကြောင်းပြကာမြေတဝက်ကိုတောင်းဆိုသည်။

မူလရုံးနှင့်ပထမအယူခံရုံးတို့ကအမှုတွင်အမွေရှင်မခိုင်မ​၏အခြားပစ္စည်းများကိုခွဲဝေပေးရန်တောင်းဆိုထားခြင်းမရှိ၍ပစ္စည်းတခုကိုသာခွဲဝေပေးရန်အရေးဆိုခွင့်မရှိကြောင်းဆုံးဖြတ်သည်။

မဆင်တီတို့ကယခင်တရားလွှတ်တော်သို့အယူခံဝင်သောအခါတရားလွှတ်တော်က မဆင်တီတို့သည်အချင်းဖြစ်မြေတွင်သူတို့​၏ဝေစုဖြစ်သည့်ထက်ဝက်ကိုလက်ရောက်ရရှိရန်စောမောင်ပုအပေါ်အရေးဆိုခြင်းမဟုတ်ဘဲလက်ရှိဖြစ်သူများဖြစ်ကြသည့်သူတစိမ်းများထံမှတောင်းဆိုခြင်းဖြစ်ကြောင်း၊အမှုတွင်စောမောင်ပုအားအမှုသည်အဖြစ်ထည့်သွင်းထားရုံမျှဖြင့်အမှု​၏သဘာဝပြောင်းလဲသွားခြင်းမရှိကြောင်း၊စောမောင်ပုသည်မခိုင်မကျန်ရစ်သောအခြားပစ္စည်းများတွင်လည်းအကျိုးသက်ဆိုင်ခွင့်မရှိတော့ကြောင်း၊၎င်း​၏ပိုင်ဆိုင်ခွင့်များကိုထုခွဲပြီးဖြစ်ကြောင်း၊မခိုင်မ​၏အမွေတွင်စောမောင်ပု​၏ဝေစုသည်တဝက်သာဖြစ်ကြောင်း၊တရားလိုများခွဲဝေလိုသည့်ကိစ္စမှာအမှန်စင်စစ်ယူစွတ်နှင့်ကာဆင်တို့လက်ဝယ်ရှိအချင်းဖြစ်မြေတွင်သူတို့​၏ဝေစုကိုခွဲထုတ်ရန်ဖြစ်ကြောင်းစသည်ဖြင့်အကြောင်းပြကာမဆင်တီတို့သည်ယူစွတ်တို့အပေါ်ပစ္စည်းခွဲဝေပေးစေလိုမှုစွဲဆိုခွင့်ရှိသည်ဟုဆုံးဖြတ်သည်။

အချင်းဖြစ်မြေတွင်မဆင်တီတို့သည်ထက်ဝက်ရခွင့်ရှိသည်။

ထိုမြေကိုအဆင့်ဆင့်လွှဲပြောင်းခဲ့စေကာမူသူတို့​၏ဝေစုသည်ပျောက်ပျက်သွားခြင်းမရှိ။

သူတို့​၏ဝေစုကိုခွဲထုတ်ရန်ကိစ္စအကျုံးဝင်သဖြင့်ပစ္စည်းခွဲဝေပေးစေလိုမှုစွဲဆိုရခြင်းဖြစ်သော်လည်းအမှန်ဆိုသော်သူတို့သည်မိမိတို့​၏ဝေစုကိုယူစွတ်ထံမှလက်ရောက်ရရန်စွဲဆိုခြင်းဖြစ်သည်။

သို့ဖြစ်၍တရားလွှတ်တော်ကမဆင်တီတို့စွဲဆိုသောအမှုသည်ပစ္စည်းခွဲဝေပေးစေလိုမှုစစ်စစ်မဟုတ်ဟုအကြောင်းပြသည်။

အကယ်၍မဆင်တီတို့ကတဖက်၊ဦးလေးဖြစ်သူစောမောင်ပုကတဖက်ခွဲဝေရန်ဖြစ်ပါမူမခိုင်မကျန်ရစ်သောပစ္စည်းအားလုံးကိုခွဲဝေပေးဖို့စွဲဆိုရန်လိုပေလိမ့်မည်။

တဆက်တည်းစဉ်းစားရန်ပြဿနာတရပ်ကိုဆက်လက်ဆွေးနွေးလိုပါသည်။

အေနှင့်ဘီညီအစ်ကိုနှစ်ယောက်မြန်မာဗုဒ္ဓဘာသာဝင်မိဘများထံမှအမွေရထားသောအိမ်တဆောင်ကိုအေကညီဖြစ်သူဘီအားအသိမပေးဘဲစီအားရောင်းချလိုက်ရာမှစီ​၏လက်ဝယ်သို့ရောက်ရှိသွားသည်။

ဘီသည်မိမိ​၏ဝေစုတဝက်ကိုစီထံမှရရန်အလို့ငှာပစ္စည်းခွဲဝေပေးစေလိုမှုစွဲဆိုနိုင်သလား၊သို့တည်းမဟုတ်၊ဘီသည်အေအပေါ်အမွေစီမံခန့်ခွဲပေးစေလိုမှုကိုဦးစွာစွဲဆို၍အချင်းဖြစ်အိမ်တွင်ထက်ဝက်ရခွင့်ရှိကြောင်းဒီကရီရရှိပြီးမှစီအပေါ်မိမိဝေစုကိုရရန်အတွက်ပစ္စည်းခွဲဝေပေးစေလိုမှုထပ်မံစွဲဆိုရန်ဖြစ်သလား၊ဤပြဿနာနှင့်စပ်လျဉ်း၍တိုက်ရိုက်စီရင်ထုံးရှာမတွေ့သေးပါ။

စီသည်အမွေဆိုင်မဟုတ်၍ဘီကစီအပေါ်ပစ္စည်းခွဲဝေပေးရန်စွဲဆိုနိုင်သည့်အခြေအနေရှိသည်ဟုဆိုနိုင်ပါသည်။  

မဆင်တီစီရင်ထုံးသည်အဖြေဖြစ်နိုင်ပါသည်။

အမွေစီမံခန့်ခွဲပေးစေလိုမှုစွဲဆိုဖြေရှင်းပြီးမှသာ ဘီသည်အချင်းဖြစ်အိမ်တွင်အမွေရခွင့်ရှိမရှိ သိနိုင်မည်ဖြစ်ပါသည်။

ဒေါ်ဒေါ်ရှင်စီရင်ထုံးကိုကြည့်ပါ။

သို့ရာတွင်ဒေါ်ဒေါ်ရှင်အမှုနှင့်ဖြစ်ရပ်ချင်းတူလှသည်မဟုတ်ပါ။

ဘီသည်အေနှင့်စီအပေါ်ပူးတွဲတရားစွဲဆိုပြီး၎င်းအမှုတွင်အမွေကိစ္စကိုလည်းတပေါင်းတည်းအဆုံးအဖြတ်ပေးလျှင်ဖြစ်နိုင်မည်ထင်ပါသည်။