1961 BLR ( H C ) 132 ၊ မညို နှင့် မလှခင်ပါ၂
ဆရာကြီးဦးမြသင်ကြားပို့ချချက်များ
1961 BLR ( HC ) 132
မညို နှင့် မလှခင်ပါ၂
တရားဝန်ကြီးဦးအောင်ခိုင်နှင့်ဦးစောဘသိန်းတို့ရှေ့မှောက်တွင်ကြားနာပြီးနောက်၊တရားဝန်ကြီးဦးစောဘသိန်းအမိန့်ချမှတ်သည်။
အမှုတွင်ဒေါ်အေးကြည်ဆိုသူကသူပိုင်ရေနံတွင်းများကိုမဖက်တီမာဘီဘီဆိုသူအားရောင်းချသည်။
နောက်ပိုင်းတွင်ဝယ်သူသေဆုံးသွားရာ၊မလှခင်ကဥပဒေတမျှအာနိသင်ရှိသောဓလေ့ထုံးတမ်းအရရေနံတွင်းများပိုင်ဆိုင်ခွင့်မှာရောင်းသူဒေါ်အေးကြည်လက်ဝယ်သို့ပြန်ရောက်သွားကြောင်း၊ဒေါ်အေးကြည်ကွယ်လွန်သောအခါမိမိသည်ဒေါ်အေးကြည်၏အနီးစပ်ဆုံးဆွေမျိုးဖြစ်၍အမွေဆက်ခံကြောင်းစသည်ဖြင့်အဆိုပြုပြီးမညိုနှင့်မဖတ်တီမာဘီဘီ(ရေနံတွင်းများဝယ်သူမဟုတ်သောသူဖြစ်ဟန်တူသည်)တို့အပေါ်၊အဆိုပါရေနံရိုးကိုရထိုက်သူဖြစ်ကြောင်း၊မြွက်ဟကြေညာပေးစေလိုကြောင်းစွဲဆိုသည်။
မညိုကမလှခင်အဆိုပြုသကဲ့သို့၊ဓလေ့ထုံးစံရှိကြောင်းထောက်ခံသော်လည်း၊မိမိသာလျှင်ဒေါ်အေးကြည်၏အနီးစပ်ဆုံးဆွေမျိုးဖြစ်သဖြင့်၊မလှခင်သည်တောင်းဆိုသောသက်သာခွင့်ကိုမရသင့်ကြောင်းထုချေသည်။
မဖက်တီမာဘီဘီကမူ၊မလှခင်နှင့်မညိုတို့စွပ်စွဲသကဲ့သို့ဓလေ့ထုံးစံမရှိဟုငြင်းသည်။
မူလရုံးကရေနံတွင်းများဝယ်ယူသူအနိစ္စရောက်သောအခါ၊ယင်းရေနံတွင်းများသည်ရောင်းသူဒေါ်အေးကြည်ပိုင်အဖြစ်သို့ပြန်လည်ရောက်ရှိသွားသည်ဆိုသောဓလေ့ထုံးစံမရှိကြောင်းကောက်ယူ၍၊မလှခင်စွဲဆိုသောအမှုကိုပလပ်လိုက်သည်။
မညိုတင်သွင်းသောအယူခံတွင်၊ယခင်တရားလွှတ်တော်ကအထက်တွင်ဖော်ပြခဲ့သည့်အတိုင်းထုံးဖွဲ့သော်လည်း၊မညိုသည်အယူခံဝင်ခွင့်မရှိဟုအောက်ပါအတိုင်းသုံးသပ်သည်။
"သို့သော်ထိုအမှုတွင်ယူဆဆုံးဖြတ်ထားသောအချက်မှာ၊အချင်းဖြစ်ရေနံတွင်းအရိုးသည်ဝယ်သောသူသေဆုံးလျှင်၊ရောင်းသူအရိုးရှင်ထံသို့ပြန်လည်ရောက်ရှိသည်ဟုဆိုသောဥပဒေတမျှခိုင်မြဲသည့်ထုံးတမ်းစဉ်လာမရှိဟူ၍ဖြစ်သဖြင့်၊ထိုဆုံးဖြတ်ချက်သည်၊၎င်းနှင့်မလှခင်တို့အတွက်ပိတ်ပင်တားမြစ်ခြင်း( Res Judicata )ဖြစ်ရန်အကြောင်းရှိသော်လည်း၊၎င်းနှင့်မဖက်တီမာဘီဘီတို့အတွက်အခြားအမှုများတွင်ပိတ်ပင်တားမြစ်ခြင်း( Res Judicata )ဖြစ်ရန်အကြောင်းမရှိဟုထင်မြင်သဖြင့်ထိုယူဆုံးဖြတ်ချက်( Finding )နှင့်ပတ်သက်၍ဤရုံးတော်သို့အယူခံဝင်နိုင်ခွင့်မရှိချေ"
အမှုတွင်တရားပြိုင်မညိုကရေနံတွင်းများဝယ်သူကွယ်လွန်သောအခါယင်းရေနံတွင်းများနှင့်စပ်လျဉ်းသည့်ပိုင်ဆိုင်ခွင့်သည်ရောင်းသူသို့ပြန်လည်ရောက်ရှိသွားသည်ဟုထုချေ၍၊မဖက်တီမာဘီဘီကမူယင်းကဲ့သို့သောဓလေ့ထုံးတမ်းမရှိဟုငြင်းကွယ်သည်။
သို့ဖြစ်၍သူတို့နှစ်ဦး(မညိုနှင့်မဖက်တီမာဘီဘီ)၏အကျိုးသက်ဆိုင်ခွင့်တို့သည်ဆန့်ကျင်လျက်ရှိသည်။
မလှခင်စွဲဆိုသောအမှုအနိုင်အရှုံးမှာ၊ယင်းဓလေ့ထုံးစံရှိ၊မရှိဆိုသောပြဿနာနှင့်စပ်လျဉ်းသည့်ဆုံးဖြတ်ချက်အပေါ်မူတည်သည်။
သို့ဖြစ်ရာယင်းကဲ့သို့သောဓလေ့ထုံးစံမရှိဟူသောဆုံးဖြတ်ချက်သည်၊မလှခင်၏အကျိုးကိုသာမကမညိုကိုလည်းထိခိုက်နစ်နာစေသည်ဖြစ်ရာ၊မညိုနှင့်မဖက်တီမာဘီဘီတို့အကြားတွင်လည်းမီးသေနိုင်သည်။
ထိုသို့ဆိုလျှင်ယင်းဆုံးဖြတ်ချက်ကိုမညိုအနေဖြင့်အယူခံဝင်ခွင့်ရှိရပေမည်။
ယခင်တရားလွှတ်တော်က၊ယင်းဆုံးဖြတ်ချက်သည်မညိုနှင့်မဖက်တီမာဘီဘီတို့အကြားတွင်မီးသေခြင်းမရှိဟုဆုံးဖြတ်ရာ၌၊အကြောင်းပြထားခြင်းမရှိကြောင်းတွေ့ရသည်။
Comments
Post a Comment