ပဋိညာဉ်အက်ဥပဒေပါပြဌာန်းချက်များသည်မြန်မာဥပဒေပညာရှင်တို့နှင့်စိမ်းသည်။

ဆရာကြီးဦးမြသင်ကြားပို့ချချက်များ

ပဋိညာဉ်အက်ဥပဒေပါပြဌာန်းချက်များသည်မြန်မာဥပဒေပညာရှင်တို့နှင့်စိမ်းသည်။

ပဋိညာဉ်အက်ဥပဒေသည်အင်္ဂလန်နိုင်ငံပဋိညာဉ်ဆိုင်ရာတရားဥပဒေတွင်မြစ်ဖျားခံသည်။

ပဋိညာဉ်ဥပဒေပါပြဌာန်းချက်များကိုအတော်အတန်နားလည်ရန် Pollock နှင့် Mulla တို့ပြုစုသော The Indian Contract Act ကျမ်းမျိုးကိုလေ့လာရန်လိုသည်။

ထိုကျမ်းကိုစံစာအုပ်အဖြစ်တရားရုံးများလက်စွဲ( ပထမနှင့်ဒုတိယအကြိမ်ထုတ်)တွင်သတ်မှတ်ခဲ့ဖူးသည်။

သို့ဖြစ်၍ယခင်ခရိုင်တရားရုံးတွင်ထိုကျမ်းများရှိခဲ့သည်။

ပြည်သူ့တရားစီရင်ရေးစနစ်ပေါ်ပေါက်သောအခါခရိုင်တရားရုံးပိဋကတ်တိုက်များဖရိုဖရဲဖြစ်သွားခဲ့ရာထိုကျမ်းရှိဆဲဖြစ်မဖြစ်မသိရပါ။

စာရေးသူလက်လှမ်းမီသောအဆိုပါကျမ်းမှာ၊၁၉၂၄ခုနှစ်တွင်ပဉ္စမအကြိမ်မြောက်ထုတ်ဝေသောကျမ်းဖြစ်သဖြင့်၊လွန်ခဲ့သောအနှစ်ကိုးဆယ်အတွင်းထုတ်ဝေသောအိန္ဒိယနှင့်အင်္ဂလန်နိုင်ငံစီရင်ထုံးများအကြောင်းသိခွင့်မရ။

—————————

ကိုယ်စားလှယ်တဦးသည်မိမိအားကိုယ်စားလှယ်လွှဲသူတဦးအပေါ်တင်ရှိသောတာဝန်ဝတ္တရားများကိုဆောင်ရွက်ရသူဖြစ်ရာ၊ကိုယ်စားလှယ်လွှဲသူ၏အကျိုးစီးပွါးနှင့်ဝိရောဓိဖြစ်တန်ရာသောမိမိအားပုဂ္ဂလိကအကျိုးစီးပွါးရရှိစေသည့်သဘောတူညီချက်မျိုးကိုချုပ်ဆိုခြင်းမပြုနိုင်။

ကိုယ်စားလှယ်သည်မိမိအားကိုယ်စားလှယ်လွှဲသူအပေါ်ယုံကြည်ခြင်းခံရသူ၏တာဝန်ဝတ္တရားများရှိသည်။

ဆိုလိုသည်မှာကိုယ်စားလှယ်လွှဲသူအပေါ်အပြည့်အဝသစ္စာရှိရမည်ဖြစ်သည်။

သို့ဖြစ်၍ကိုယ်စားလှယ်အလုပ်တာဝန်ကိုဆောင်ရွက်ရာ၌မိမိအကျိုးအတွက်ဆောင်ရွက်ခွင့်မရခြင်းဖြစ်သည်။

[ 1967  ] 2 AC 46

Boardman v. Phipps

Before Lords Cohen, Guest and Hudson

အင်္ဂလန်နိုင်ငံစီရင်ထုံးဖြစ်သည်။

A. C သည် Appeal Court ၏အတိုကောက်ဖြစ်သည်။

2 သည်အတွဲ၂ကိုဆိုလိုသည်။

အမှုတွင်-

“Nevertheless, even if the possibility of conflict is present between personnel interests and the fiduciary position the rule of equity must be applied.”

ဟုပြဆိုသည်။

ကိုယ်စားလှယ်သည်ကိုယ်စားလှယ်လွှဲထားသောပစ္စည်းကိုမိမိအတွက်ဝယ်ယူလျှင်မိမိ၏ပုဂ္ဂလိကအကျိုးစီးပွါးနှင့်ယုံကြည်အပ်နှံခြင်းခံရသူ၏အနေအထား(fiduciary position)တို့သည်ဝိရောဓိဖြစ်ပေလိမ့်မည်။

ထိုအခါတရားရုံးကတရားမျှတမှုကိုရှေ့ရှု၍စွက်ဖက်အရေးယူရသည်။